酒醉清醒之後

終於，如願以償，飲醉酒。其實冇話想飲醉酒，因為前一晚又係飲酒飲到嘔，雖然未醉到神智不清，但係都有啲驚，同埋第二日又要返十半。點知一開咗個頭，就好似停唔到咁，完全唔知道自己已經到咗頂，仲係咁飲。結果，路都行唔到。今朝九點幾已經辛苦到想死完全瞓唔到，打開眼第一個反應係：「我喺邊度？點解我會喺度？」然後記憶好似拼圖咁逐塊逐塊切返個畫面出黎－－原來，琴日喺唔知邊一刻突然間醉到全身無力，行都行唔到，係同事將我抬上的士，落車後就有同學將我搬返房。

飲醉咗之後，應該冇做到啲咩驚人既舉止，但係就好想知道係邊一個幫我換制服－－係自己？定係同事？係好小事，但係足足煩擾咗我一日，更衰既係返到公司之後唔好意思咁問人。後黎有人主動撩起呢個話題，乘機取笑吓我，我又乘機咁問：「琴晚係咪我自己換衫？」點知人地答：「係我將你禁落地除晒你啲衫再幫你著架！」好驚，不過無論係邊樣都好，我一啲記憶都冇。

老實講，我都想知自己發生乜事。最近淨係好想好想飲酒，一諗起酒啲口水分泌就出晒嚟。學期尾特別多野做，但係就唔係太想理，因為實在太煩惱，倒不如飲吓酒等啲神經舒緩吓仲好。

仲有，只要你你我我有少少醉意，再守唔住任何秘密時，情感就會隨缺口通瀉而出，咪仲暢快。之後，要煩既都唔會再係現實生活之中不斷迫緊埋嚟既事，而係點喺清醒之後再去輕輕鬆鬆咁面對大家，又或者點樣可以再搵下次醉酒機會去親近對方。

朋友問我點解咁鐘意飲酒，我只係想講一句：「有時，樣樣都太清醒反而唔係咁好。」

盲山, 2007

導演李楊說得對，<<盲山>>要批判的，不單是中國農村拐賣婦女一事。

<<盲山>>是一部很好的電影，但一點也不好看。不好看在於它所選取的題材太黑暗，而它的表達手法也太赤裸。故事發生在九十年代初的中國，講一個大學畢業的女孩白雪梅被騙，遭拐賣到陜西山區當農民妻妾；她被禁固、被強姦，曾自殺，卻被救活。她出走，一次比一次的走得遠，卻始終被抓回來。幾年後，總算聯絡上親父，找來公安營救她，可惜受到村民反抗，公安亦棄之不顧。雪梅眼見「丈夫」痛歐欲保護女兒的父親，毅然舉刀劈向「丈夫」，畫面停留在雪梅那茫然的臉上，電影隨即結束。觀眾不知那一刀劈在哪，不知道被劈的最後有無死去，更不知道雪梅過後的命運；也許，早在最初雪梅被騙的那一刻，已決定了她那無法逆轉的命途。

隨處騙賣女性到農村作媳自然可恨，但問題到底出在哪裏才值得深思。雪梅受過教育，大學畢業，卻因為一時貪快錢，想盡快還清家中的債以及供弟弟上大學而被誘到山區，其實很無知。電影起首，假裝藥行經理的騙子只要一個簡單的橡膠圈把戲便逗得雪梅笑個不亦樂乎；那所謂的同行，一句「老朋友」，兩句「不幫你還可幫誰」便完全取得雪梅信任。請問，教育制度的意義何在？無他，因為整個中國都窮。無論是醫院的醫生護士，公路上停下來的司機，甚至公安，假若未曾受惠，哪管誰人把手腕都割破。在山上的農村內，知識被視為次等需求。電影中有一幕顯示村中其中一間農屋的牆上被漆上這樣的句子：「要致富多種樹　少生娃多養豬」。可恨的是，農村內永遠最需要男丁，而農村的男丁其實不需要太多知識；男人於山區來說最重要是令女人懷孕，買回來的老婆不聽話嗎？大不了在親友協助下將「老婆」強姦，打她，用鎖鍊鎖起她。

電影中令人毛骨悚然的地方不在於村民的原始和殘暴，更是那明知不可為而為之的心態。國家派高級領導到山區巡察，鄉委會便把拐來的婦女藏起。雪梅的「丈夫」明知買人是犯法，他偏反指若付了七千元也得不到人，他才是受騙者。雪梅的「奶奶」可憐雪梅的遭遇，卻只安慰她做女人總有「嫁人」的一天。

預科時中化一科常言道中國是個追求集體主義的社會，講仁道；現在看來未免太天真。集體主義不是不存在，但若只存在於相連相依的農村中，便成了恐怖主義。這也是為甚麼雪梅每次一逃跑村民便聚起來四出抓她，也解釋到後來公安一出現便被村民群起而攻之。然而，若中國人講求集體主義，那為何同一個村落中所有被拐賣的女性不聯起反抗？若中國人講仁道，為何有次在雪梅逃到城鎮中路人和警員仍旁若無人，能單以一句「一切只屬家庭糾紛」而直行直過？

看完電影後，確有一刻感到恥為中國人。看著李楊如此深刻的將這中國的傷口挖開再放上銀幕，其實需要很大的勇氣。我想，只有真的很愛中國的人，才能如此深入去體會中國的錯，繼而作出這般有如切膚之痛的內省。

沒有電話的日子（大結局）

終於，死死氣咁去出返張電話咭，轉台，順便轉埋個號碼。爽。人地話要轉個心情不如去轉個髮型我話不如轉個電話號碼仲實際。

過去三十日裏面，證實咗今時今日所謂科技發達既社會即使冇咗電話係唔會死。即使有人話我實約唔到既Re-U都no problem。而事實係，身邊有電話既人啲電話唔係short short地就係冇電或者call極都聽唔到電話響－－都唔知要個電話黎做乜。

只不過係，有時無無聊聊等車搭車時冇咁啲野拎喺手度禁吓禁吓，唔覺意撞到啲唔想見既人時冇得扮講緊電話閃開，有啲咩好興奮想即刻話俾人知時要忍住，朝早冇咗個又夠響又準確既鬧鐘，驚第二日上堂唔知醒時叫唔到人morning call我等等等等。至於人地搵唔到我，有咩唔方便，我就唔咁清楚。

朋友問我做乜轉電話轉得咁突然，又話以前啲人會搵唔返我。事實係我要佢地搵我唔到既話改唔改電話號碼都冇分別，仲有，既然大家咁耐都冇搵大家，就算約出黎都唔知做咩既話，倒不如大家一齊向前望把啦。更重要既係，我真係真係真係唔想俾公司再搵到我。決定要走，就要瀟洒咁走，一條毛都唔留低。

如果話冇咗個電話會冇晒啲朋友，我會話冇咗部電腦又或者上唔到網就真係連阿豬阿狗乜都冇得淨。好彩，過去呢個月，我仲有得上網睇新聞上facebook上xanga上吓自己個blog，如果唔係，真係死得。